Tsohon Shugaban Ƙungiyar Daliban ATBU Ya Soki Yunkurin Cire Kalmar “Technology” Daga Sunan Jami’ar

Tsohon Shugaban Ƙungiyar Daliban Jami’ar Abubakar Tafawa Balewa (ATBU) Bauchi, Muhammad Aliyu wanda aka fi sani da Songuy, ya bayyana rashin amincewarsa da kudirin da ake yi na mayar da jami’ar daga ta kimiyya da fasaha zuwa jami’a ta gama-gari.

Songuy ya bayyana wannan yunkuri a matsayin “mataki na komawa baya,” yana mai cewa duniya tana ci gaba cikin sauri ne saboda ci gaban fasaha da kere-kere.

Ya ce ko da yake a Najeriya ana ganin jami’o’in gama-gari suna taimakawa wajen samar da ma’aikata da inganta tattalin arziki, amma gaskiyar magana ita ce fasaha ce ginshiƙin ci gaban duniya.

“A yau, duniya tana cigaba ne saboda fasaha. Amma a Najeriya, ana yawan jaddada cewar jami’o’in gama-gari ne ke samar da ma’aikata da bunƙasa tattalin arziki. Amma gaskiya ita ce, fasaha ta fi wadannan abubuwa nesa. Kada mu rikita ci gaba da koma baya,” in ji shi.

Muhammad Aliyu ya shugabanci Ƙungiyar Daliban Jami’ar ATBU a shekarar karatu ta 2010/2011.