Ana zargin wasu ‘yan bindiga da kashe wani shugaba a ƙauyen Zalau, cikin Ƙaramar Hukumar Toro ta Jihar Bauchi

Ana zargin wasu ‘yan bindiga da kashe wani shugaba a ƙauyen Zalau, cikin Ƙaramar Hukumar Toro ta Jihar Bauchi, Alhaji Muhammad Bakoshi, yayin wani hari da suka kai wa garin.

‘Yan bindigar sun kuma sace daya daga cikin matan shi, Hannatu Muhammad, yayin harin da aka kai a daren ranar.

Wani mazaunin yankin, Shamsuddeen Hashimu Zalawa, ya shaida wa Daily Trust cewa, ‘yan bindigar da adadinsu ba a tabbatar ba, sun shiga ƙauyen da misalin tsakar dare, suka harbi bindigogi sama, wanda ya janyo tsoro da rudani a cikin al’umma.

Harin ya bayyana a fili cewa an kai shi ne musamman kan gidan ɗan kasuwa, inda suka kashe shi sannan suka sace matarsa.

Marigayi Bakoshi ɗan kasuwa ne mai mallakar masana’antar tubali a ƙauyen, kuma yana da hannu wajen tsaro a cikin al’umma, musamman a tsakanin masu farauta. Haka kuma, ya kasance Discipline Officer na First Aid Group na Jama’atu Izalatil Bid’ah Wa Iqamatus Sunnah (JIBWIS) a Zalau.

An bayyana cewa, marigayin yana da mata biyu, inda aka sace uwar gidan sa, yayin da matar ta biyu, wadda kwanan nan ta haifi ɗa, aka bar ta.

Har yanzu ba a samu martani daga Hukumar ‘Yan Sanda ta Jihar Bauchi ba.