YANZU-YANZU: Kotu ta wanke dan sanda Abba Kyari daga gaba daya tuhume-tuhumen da ake masa

Mai Shari’a James Omotosho na Babbar Kotun Tarayya da ke Abuja ya sallami tare da wanke dakatararren Mataimakin Kwamishinan ‘Yan Sanda, Abba Kyari, daga tuhume-tuhume guda 23 na zargin rashin bayyana kadarori da Hukumar National Drug Law Enforcement Agency (NDLEA) ta shigar a kansa.

An gurfanar da Mista Kyari tare da ‘yan’uwansa guda biyu, inda ake zarginsu da rantsuwa kan takardun shaida na karya domin ɓoye asalin wasu kadarori.

A cikin hukuncinsa, Mai Shari’a Omotosho ya bayyana cewa NDLEA ta gaza gabatar da isassun hujjoji da za su tabbatar da zarge-zargen, musamman dangane da batun rashin bayyana filayen kadarori.

Kotun ta ce tabbatar da mallakar fili na iya samuwa ta hanyar tarihin gargajiya, takardun mallaka, ayyukan mallaka ko kuma mallaka ta alaƙa, amma masu gabatar da ƙara ba su gabatar da ko ɗaya daga cikin waɗannan hujjoji ba domin nuna cewa kadarorin da ke Fountain Estate, Kasana, mallakin Abba Kyari ne, duk da cewa an ce na Ramatu Kyari ne.

Haka kuma, kotun ta ce babu wata hujja mai ƙarfi da ta danganta Kyari da wasu kadarori da ke kan titin Linda Choko a Asokoro da kuma a Maiduguri, Jihar Borno.

A nasa ɓangaren kare kai, Kyari ya bayyana cewa kadarorin da ke Borno mallakin mahaifinsa ne wanda ya bari masa da ‘yan’uwansa a matsayin gado, kuma masu gabatar da ƙara ba su iya karyata wannan ba.

Kotun ta kuma ce an tuhumi ‘yan’uwan Kyari da laifin haɗa baki ne ba tare da hujja mai ƙarfi ba, lamarin da ya nuna rashin gaskiya a shari’ar.

A ƙarshe, kotun ta bayyana cewa shari’ar NDLEA ba ta da ƙarfi, tare da sallamar dukkanin waɗanda ake tuhuma.

An bayyana cewa wanda ake tuhumar ya yi wa ƙasa hidima tsawon lokaci, don haka bai kamata a ci gaba da tsananta masa ba.